Día da Muller Traballadora
-Derrubando muros-
|
A performance que ideou Natalia para conmemorar este 8 de marzo levounos a aprovisionarnos de varias dúcias de caixas e envolvelas en papel estraza. A pretensión é...facer un muro! Pero, non abonda de muros, non estamos en contra dos muros que dividen países, que separan, que segregan...? Non nos da noxo o muro de Trump? Claro, claro que aborrecemos os muros, pero para derrubar un muro e que esa caída sexa simbólica, antes temos que construir un. Porque esa é a idea: o muro que está separando as mulleres dos homes, o muro que aínda segrega as mulleres e lles impide a igualdade salarial, o muro da ideoloxía machista que as somete subrepticiamente (ou de forma directa), o muro sexista e retrógrado que considera, como o cretino eurodiputado polaco, que “As mulleres deben gañar menos porque son máis débiles e menos intelixentes”, ese absurdo muro... xa vai sendo hora de derrubalo.
Así foi como puxemos ao alumnado de 3º ESO a construir un muro e a pintar sobre el os signos feminino e masculino. Logo lles pedimos que o tirasen e, mentres soaba a canción "Everyone's Got Something", demostrasen a fraternidade universal con apertas. |
| ||
